AULAS DE INVERNO (II)

Quedamos abraiadas do moito e ben que traballou o noso alumnado de 1º e 2º da ESO. Daba gusto ver as súas caras de ilusión cando o xurado visitaba a súa aula. Se ben houbo só un gañador por categoría, 1ºR en 1º ESO e 2ºS en 2º ESO, tod@s o foron porque o fixeron realmente ben. Queremos agradecer especialmente aos titores e titoras (Esther Pereira, Conchi Seguín, Remedios Salgueiro, Susana Iglesias e Manolo Rodríguez) pola paciencia infinita que tiveron para poder levar a cabo esta actividade. Por suposto, non podemos esquecernos do noso xurado: Adrián Brey, Vanesa Frade, Sara Oca, Estela Pintos e Araceli Queiruga. Tiveron un labor realmente difícil! O ENDL temos claro que nada se pode facer sen a colaboración do alumnado, profesorado e persoal non docente e Aulas de Inverno é proba diso. Grazas, grazas e mil grazas!!!

1º R
1º S
1º T
2º R
2º S
2º T	Xurado

O TABOLEIRO DOS BOS DESEXOS (II)

Pois ao final logramos levar a cabo un taboleiro de bos desexos xeitoso. Fómolo enchendo coas boliñas de cores. O deseño foi idea de Chus Vázquez, a nosa Vicedirectora, e púxoa en práctica Teresa Paz, que sempre está disposta a botarnos unha man. Graciñas a tod@s @s que achegastes os vosos desexos para este ano novo. Estamos seguras de que será ventureiro!!!

O TABOLEIRO DOS BOS DESEXOS

Cando queda xa tan pouquiño para recibir o ano novo, o Equipo de Normalización e Dinamización Lingüística do IES Pontepedriña pretendemos facervos reflexionar sobre aqueles desexos desinteresados que queredes que se cumpran para o ano que vén. Baixo o lema "Enchamos o 2018 de...", animádevos a poñelos por escrito nas boliñas que temos preparadas.  Aparecerán expostos no taboleiro que se atopa na entrada do instituto. Quen sabe! Ao mellor a enerxía positiva que xeramos fai que nos sexan concedidos... 😋

Nós xa fixemos a nosa achega. Agardamos polas vosas!

AULAS DE INVERNO

 

O Equipo de Normalización e Dinamización Lingüística do IES Pontepedriña convoca un concurso de decoración de aulas para celebrar a chegada do inverno e a entrada do aninovo entre o alumnado de 1º e 2º de ESO.

A decoración das aulas levarase a cabo durante a última semana de clase antes das vacacións de Nadal e será de temática invernal. Así mesmo, deberán incluír felicitacións de aninovo en lingua galega. Valorarase especialmente a utilización de materiais reciclados, re-utilizados e respectuosos co medio ambiente.

Estamos desexos@s de ver os resultados!!!

VOCES DA ESCOLA (RADIO VOZ)

Daniel Méndez, Alicia Novoa, Carla Penas e Paula Alfonsín, alumnado de 4º de ESO, deron os seus primeiros pasos como xornalistas entrevistando a Patricia de Lorenzo, actriz do Grupo Chévere.

Na sección "Voces da Escola" do programa "Voces de Compostela" de Radio Voz en Santiago de Compostela, os nosos mozos e mozas someteron a actriz a unha exhaustiva entrevista, incidindo na súa experiencia laboral e na súa idea do feminismo.

25 DE NOVEMBRO (III)

Para rematar coas actividades que conmemoran o 25N, Chus Vázquez, vicedirectora deste centro, programou tres sesións interactivas nas que Gloria Vázquez e as súas compañeiras da Asociación Ve-la Luz (Asociación Galega para a Defensa de Mulleres e Nen@s Superviventes da Violencia de Xénero e/ou Abusos) abordaron a problemática da violencia machista co noso alumnado de 3º ESO, 1º Bacharelato e FP Básica. Foron moi instrutivas, polo que de seguro repetiremos experiencia.

25 DE NOVEMBRO (II)

Esta semana estivemos moi atarefad@s coa preparación das actividades do 25N, pero pagou a pena. Intentamos facer a nosa pequena achega recollida neste vídeo. Agardamos que vos guste...

25 DE NOVEMBRO

PROGRAMA

15/11/2017: Durante os primeiros recreos desta semana e da que vén, o noso compañeiro do Departamento de Xeografía e Historia, Rafa Lobelle, estará na aula de usos múltiples coordinando a elaboración de carteis e pancartas para concienciarnos sobre a necesidade de erradicar a violencia de xénero. Tamén se pide a colaboración de toda a comunidade educativa para que engadades un post-it de distintas cores co voso lema en contra da violencia. Animádevos a participar!!!

 

28/11/2017: Gloria Vázquez, membro da Asociación Ve-la Luz (Asociación Galega para a defensa de mulleres e nen@s superviventes da violencia de xénero e/ou abusos) impartirá unha serie de charlas interactivas sobre esta problemática. Velaquí o horario:

- 3ºA (10:45 - 11:35)

- FP Básica (11:35 - 12:25)

-1ºD (12:45 - 13:35)

- 3ºB (13:35 - 14:25)

 

Ademais, durante a vindeira semana os corredores do noso centro servirán de lenzo para expor a escolma de cancións contra o maltrato realizada polo alumnado de 1º de Bacharelato e coordinada pola nosa compañeira Cristina Quintáns.

Ao mesmo tempo, a nosa compañeira do Departamento de Lingua Galega, Mariló Lagarón, foi a encargada de supervisar a actividade "Chíos contra o maltrato", emulando as mensaxes da célebre rede social. Algúns deles participaron no concurso chíos de twitter contra a violencia de xénero, organizado polo Concello de Lalín.

Temos por diante unha semana comprometida con esta causa, polo que precisaremos da vosa axuda. Súmate á xeira!!!

SAMAÍN 2017 (II)

O prometido é débeda. Estamos convencidas de que o noso alumnado de 1º e 2º de ESO cumpriu coa tradición de espantar os malos espíritos polo Samaín. Velaquí a proba:

  

Estamos moi satisfeitas de como se desenvolveu toda esta festa. Reiteramos o noso agradecemento a todas aquelas persoas que colaboraron connosco no centro, pero tamén ao alumnado e ás súas familias pola súa implicación.

Que pasedes un bo Samaín!!! 

SAMAÍN 2017 (I)

Este ano o Equipo de Normalización e Dinamización Linguística animámonos a celebrar o Samaín no centro. Quixemos que o noso alumnado coñecese a orixe ancestral desta festa polo que elaboramos este vídeo, asesoradas polo noso compi de Xeografía e Historia, Rafa Lobelle:

A nosa alumna de 2º de ESO, Yulia Ovchinnikova, foi a encargada de elaborar o cartel que anunciaba o Samaín. Como pode apreciarse, o resultado foi "terrorífico":

 

Para levar a cabo esta tarefa, tivo axuda por parte dunhas magníficas colaboradoras: Irene, Iria, Lucía, Rebeca e Silvia, alumnas de 3º de ESO.

Contamos ademais coa inestimable contribución das nosas compañeiras Rosa, Teresa e Vanesa para ambientar o centro:

Por outra banda, o alumnado de 1º de ESO demostrou que ten verdadeiro talento artístico, como pode verse no deseño das súas cabazas. Foron estupendas todas elas!!!

Finalmente, o Departamento de Lingua Galega animou ao alumnado a buscar inspiración no Samaín para redactar os seus relatos curtos. Velaquí o resultado:

O Equipo de Dinamización sentímonos moi arroupadas por toda a comunidade do noso centro, non só por ternos axudado a decorar, senón tamén polos ánimos recibidos. Graciñas. Mañá continuará...

Descarga o álbum completo aquí

DÍA INTERNACIONAL DA BIBLIOTECA

O 24 de outubro é o Día Internacional da Biblioteca. Xosé Tomás é o ilustrador que este ano achega a súa creación a todas as bibliotecas escolares do territorio galego, co lema: "Aprender a pensar coa biblioteca escolar". No IES Pontepedriña aproveitouse para que o noso novo alumnado de 1º ESO se familiarizase coa biblioteca e tirase proveito dela. Estamos segur@s de que así será.

VISITA AO MUSEO DO MAR (VIGO)

Os departamentos de Lingua Galega, Xeografía e Historia, Música e o Equipo de Dinamización e Normalización organizamos unha visita ao Museo do Mar en Vigo co alumnado de 3º ESO e 1º de Bacharelato. Foi a ocasión perfecta para poder ver o Pergamiño Vindel, que contén as sete cantigas de amigo compostas por Martín Códax no século XIII, aproveitando que estará alí exposto ata o vindeiro 4 de marzo.

Tras pasar a mañá no Museo, antollouse boa idea viaxar en barco ata a Illa San Simón, co gallo de coñecer o seu pasado histórico como leprosaría, cárcere ou fogar de orfos. O tempo acompañou, polo que se puido gozar desta paisaxe única.

Descargar álbum completo

QUE VAI SER DA NOSA TERRIÑA?

Que mágoa dá ver como arde o patrimonio natural que han de herdar os nosos fillos e fillas!!! Como se pode querer tan pouco a propia terra!!!

Esta imaxe fala por si mesma. Que tristura, que carraxe, que impotencia...

CONTRA A VIOLENCIA DE XÉNERO (CONCELLO DE LALÍN)

Queremos animar ao noso alumnado a loitar contra a violencia de xénero nun concurso que organiza o Concello de Lalín. Velaquí as dúas modalidades de participación:
1. XIV Concurso de cartas "Dillo a quen maltrata" 2017

Bases

2. VI Concurso de Tuits conta a violencia de xénero 2017

Bases

Bulide!!! Os prazos de presentación rematan o 3 de novembro e o 10 de novembro, respectivamente. Podedes atopar máis información en www.lalin.gal

CURTOCIRCUITO 2017

Un ano máis, o alumnado de Bacharelato do IES Pontepedriña asistiu ao Festival Internacional de Curtametraxes Curtocircuito no Teatro Principal. 

Alí, e dentro do programa Teenage Riot que insta á mocidade a loitar polos seus ideais, gozaron destas tres curtas na súa versión orixinal con subtítulos en lingua galega:

Rakastan Anna (Amo a Anna), de Joonas Rutanen (Finlandia)

Rocknrollertjies (Rocknrollers), de Daan Bol (Países Baixos)

Wenn du rausgehst (Se saes), de Nuria Gómez Garrido (Alemaña). Esta última colleitou moi boas críticas entre o noso alumnado.